السلام عليكم و رحمة الله و بركاته
يالله حيّهم فردا ً فردا ً ..
من زمان والله عن المواضيع .. لكن اللي صار اليوم يجبرني اكتبه ..
ابغاكم بس تعيشون معاي اللي صار لحظه بلحظه ..
قمت من النوم صلاة المغرب .. دقيت على خويي و رفيق دربي ابو حسين ..
ها ابو حسين اخبارك وش مسوي .. وينك .. قال في البيت ..
قلت جهّز نفسك جايك ..
شغلت السياره ورحت له .. تمشينا و افطرنا سوى .. و رجعته على صلاة العشاء ..
جاء ابو حسين بينزل من السياره .. فقلت له انزل و رح جب الكاميرا الديجيتال حقتك لاني ابغاها ..
قالي وش تبغى فيها .. قلت باخذ صور طلعتنا للبر الأخيره و بحفظها بجهازي .. قال اووكي !!
راح ابو حسين و جابها و ودعته و مشيت .. و قال موعدنا الساعه 10 !! قلت اوووكي ..
رجعت البيت خذيت امي ودّيتها هارديز و خليتها تعشيني و سولفنا لين طفشنا من بعض .. و رجعتها البيت ..
شوي و جوالي يدق الا وهو جارنا الطيّب الخلوق ابو عابد ..
ها ابو عابد شعندك .. قال الساعه 10 جهّز نفسك تعال صالة الفناتير عندنا مباراه خفيفه بينا احنا شباب .. قلت اوكي سجلني معكم .. قال اوكي موعدنا 10 بصالة الفناتير !!
والله و جت 10 و ابدّل و اطلع و اروح صالة الفناتير .. و انا نازل الا و جوالي يدق .. اطالع الا ابو حسين !! << مواعده الساعه 10 !!
رديت و قلت يا بو حسين والله انشغلت .. اطلع من المباراه و ادق عليك .. فقال .. الشرهه علي و و وو .. و انا بنام اقلب وجهك و قفل بوجهي !!
نزلت و خليت جوالي في السياره .. البنزين على الحديده على الـ ( E ) و لمبة البنزين مولعه ..
المهم نزلت و الشباب يلعبون .. طبعا ً هي صاله و الصاله ماكان فيها الا اخويانا بس ..
كان فيه مدرجات و المدرجات ماعليها احد مره .. جلست على احد المدرجات و لبست الجزمه اعزكم الله و حطيت مفتاحي و نزلت العب ..
لعبنا لعبنا لعبنا ..
و احنا طالعين ادور مفتاحي .. يمين يسار .. ياولد .. يا ابو خلود .. مالقيته !!
قلت اكيد اني نسيته في السياره و نزلت .. !!
والله و اطلع برى .. و مالقى السياره بكبرها ..
انا ماكنت مستوعب الموقف مررررررررررررررررررررره ..
قلت اكيد واحد من الشباب اللي كان موجود خذا سيارتي بالغلط على انها سيارتيه..
و شوي اخذ جوال واحد من الشباب اللي معي و ادق على جوالي و القاه مقفل .. فدريت ان السياره ( انسرقت ) !!
شوي .. و في حالة صمت و هدوء ..
برررررررررررررررررررد .. و سياره مسروقه .. و معرقين .. و الساعه 12 و العالم عندها دوامات و دراسه بكره .. الوقت مره غبي !!
المهم .. تذكرنا ان واحد صغير عمره ( 14 سنه ) دخل الصاله ..
و جلس بنفس مكان مفاتيحي .. جلس 10 دقايق بس ..
يعني اخذ المفتاح و مشى !!
الولد انا اذكر شكله بالظبط .. صغير مره .. و اسود البشره .. و شكله بريء مررررره !!
المهم على طول نقزت مع واحد من الشباب و بلغنا الدوريات .. قالوا لازم تحظرون في شرطة جبيل البلد و تكتبون بلاغ !!
والله و نروح جبيل البلد و نكتب هالبلاغ .. المهم مالكم من الطويله مرمطونا لين قلنا بس .. و اسئله غبيه و يمين و يسار ..
عاد وقتها كل اللي كانوا يلعبون معنا جالسين يدورون في الجبيل الصناعيه على امل يلقونها .. مع اننا فقدنا السياره بعد ساعه يعني امداه وصل الدمام !!
انا وش كان خوفي و وش اللي فكرت فيه .. انا اخوياه برّى ينتظرونه يوم دخل و سرق المفتاح لان مستحيل واحد بزر بهالعمر يسرق سياره فتوقعت كذا تخطيطهم !!
المهم انا على اعصابي .. و كل شوي ابوي يدق علي و يسمعني كلام يعور القلب ( يا فاغر .. يا مفهي .. يا يا يا ) !!
المهم جلسنا ندور لين الساعه 3 الفجر و مالقينا اي شيء مرررررررررره !!
انتشرنا في الجبيل في كل مكان .. لكن مالقينا اي شيء .. !!
رجعت البيت و انا ضايق صدري ..
طبعا ً في السياره جوالي .. و فيه صور عزيزيه على قلبي جدا ً ..
و فيه 60 ريال ..
و البوك ( فيه احوال - رخصه - تأمين )
الإستماره !!
و كان فيه كيس فيه جنوز و حركات توّني شاريها من زارا !!
و لاتنسون ( الكاميرا ) حقت ابو حسين اللي خذيتها منه المغرب !!
رجعت البيت الفجر هزئني ابوي و هو نايم .. رحت تروشت و تعوذت من ابليس و اخلاقي قافله ..
شوي الا و تلفون البيت يدق ..
قلت اكيد الشرطه لقوا السياره ..
الا و يطلع ابو حسين ..
قال خبر سرقة السياره وصلني ..
اطلع خلنا ندور في كل حواري الجبيل ..
والله و اطلع لبو حسين ..
و حاره حاره .. حاره حاره .. من جد فقدنا الامل و كرهنا حياتنا ..
اقل شيء توقعته ان الحرامي يحط السياره بقراج و يطلعها بعد ثلاث ايام ..
او امداه وصل الدمام ..
او راح القاها في شجره مصقوعه !!
المهم .. رجعنا نفس مكان الجريمه صالة للفناتير و دخلنا الحاره اللي قدام الصاله ..
وش لقينا ..
لوووووووووووووووووووووووووول ..
لقيت السياره زي ماهي بالظبط ..
ياولد هي والله ..
و اضم ابو حسين و ارقص عند السياره شوي من الفرحه ..
لقيت بيبان السياره مقفله .. و الحرامي الطيّب حاط لي المفتاح داخل .. << بداية الأدب !!
والله و ادق على الشرطه و اقول لقيتها ..
قالوا بنجي ناخذ بصمات ..
قلت مايحتاج مسكت السياره من كل مكان !!
قالوا اوكي ..
كسرت المثلث ( ماعندي سبير ) ..
السياره كانت معفوووووووووسه للاخير .. لقيت الكيسه و الملابس منثره ..
اول شيء دورت عليه المحظفه .. و لقيتها الحمد لله ..
الحرامي بكل ادب فتح البوك و سرق الـ 60ريال اللي فيها و خلا لي الاحوال و كل شيء ..
لقيت الإستماره ..
و سرق الجوال و الكاميرا ابن الحرام ..
بس تدرون وش الضحكه ..
قسم بالله حرامي مو صاحي ..
اول شيء اللي سرق السياره هو البزر نفسه ابو 14 سنه .. لان كرسي السياره ملزّق قدام .. يعني يالله يوصّل الدعسه .. بس كان براسه جريه و سواها !!
بس تدرون متى مت ضحك ..
انا يوم كنت نازل العب كوره كنت حاط شريط اصاله ..
و الحرامي غيّره و حط شريط رويشد بداله ..
لا و شريط اصاله رجّعه في الدرج بكل ادب ..
تدرون وش الضحكه الأحلى ..
البنزين كان على الحديده فاضي .. جيت و لقيت البنزين على النص !!
ليت كل الحراميه بهالأدب ..
حبيت اقولكم اللي صار لي اليوم .. ادري كتبت الموضوع على عجاله ..
بس فيني النوم و تعبان والله ..
و بقوم الصبح اركب لي مثلث جديد و اشتري لي جوال و اشتري لبو حسين كاميرا ..
من جد تراني مقهور ..
عفت السياره من جد ..
الإثنين يناير 28, 2008 6:15 pm
